Butunjahon salomatlik kuni munosabati bilan uyushtirilgan ushbu turnir asosiy vaqtini kompyuter qarshisida oʻtkazadigan mutaxassislar uchun nafaqat sport, balki hordiq chiqarish, oʻzaro muloqot va tajriba almashish maydoniga aylandi.
– Musobaqa barchamiz uchun ayni muddao boʻldi, – dedi “Aloqabank” AT Axborot texnologiyalarini ishlab chiqish va rivojlantirish markazi menejeri Sevinch Nuriddinova. – Kundalik bir xil ish tartibi, kompyuter va mobil qurilmalar qarshisida uzoq vaqt oʻtirish bizni biroz toliqtirgandi. Turnir esa ham kayfiyatimizni koʻtardi, ham bir-birimiz bilan dildan suhbatlashishga imkon yaratdi. Endi yangi kuch va gʻayrat bilan qaytadan ishga shoʻngʻiymiz.
Stol tennisi jismoniy va ruhiy salomatlik uchun foydali sport turlaridan biri hisoblanadi. U koʻz va qoʻl koordinatsiyasini yaxshilaydi, yurak-qon tomir tizimini mustahkamlaydi hamda ortiqcha kaloriyalarni yoʻqotishga yordam beradi. Bundan tashqari, tezkor fikrlashni rivojlantirib, stressni kamaytiradi va diqqatni jamlash qobiliyatini oshiradi. Binobarin bunday tadbirlar yosh mutaxassislarning ish samaradorligini oshirish, ularni sportga keng jalb etish va sogʻlom turmush tarzini shakllantirishga xizmat qiladi.
Musobaqa yakunlariga koʻra, erkaklar oʻrtasida “IT bilimlarni rivojlantirish markazi” MCHJ mutaxassisi Abdurasulov Bobomurod gʻolib boʻldi. Ayollar oʻrtasida esa OʻzMTRK “Yoshlar” IB AJ buxgalteri Xolida Rahimova birinchi oʻrinni egalladi.
Gʻoliblar va ishtirokchilar diplom hamda qimmatbaho sovgʻalar bilan taqdirlandilar.
Diyora RAVSHANOVA
“ISHONCH”